06/06/2023
"Жинсрэг" гэдэг нь “Өглөгийн түллэг” гэсэн утгатай үг бөгөөд арван хангал догшин бурхадын нэг болох Ямандаг бурхны үүднээс тухайн газар оронд оршсон, хүний буруу санаа сэтгэл, буруу үйлээс шалтгаалан хүмүүнд саад тотгор, хорлол үйлдэгч ад дон, газрын гүйдэл, догширсон зэрэгт ном бясалгалын үүднээс олон хэрэгтэй зүйлсийг гал мандлаар өргөн хурдаг онцгой зан үйл юм.
Жинсрэг цутгах:
Жинсрэг цутгахад эхлэн гал тахих бөгөөд галын их тахилга болох дор бэлдсэн зүйлсээ нарийн дэг жаяг, зан үйлийн дагуу бурхан шүтээн, лус савдаг, газар орны тэнгэр, элдэв ад дон, хүмүүний заяаны тэнгэрүүд, хүмүүнд хорлол үйлдэгч ягчис элдэв муу язгуурын амьтад, чөтгөр шулам, мам тийрэн, хий биет болон үнэр идэшт олон амьтдад өглөг болгон галд өргөдөг.
Ядам сахиус юмуу ямар нэгэн бурханы үүднээс жинсрэг цутгадаг бөгөөд Дарь эхийн, Ядам сахиусны, Хажидын, Сандуйн, Ямандагийн, дотоод гадаад гэх мэт маш олон төрөл зүйлийн Жинсрэг цутгах зан үйл байдаг.
Бурхан шүтээн, лус савдаг, хүмүүний хамт төрсөн тэнгэр, заяаны тэнгэр, газар орны тэнгэр, гэрийн, галын, үүдэн, тотгоны тэнгэр г.м хязгааргүй олон тэнгэрүүдэд өглөг тахилыг хязгааргүй өргөснөөр тэд машид баясаж найз нөхөд, өмөг садан мэт туслаж буг босох, лус савдаг догшрох, хорлол хөнөөл хийх, аливаа гай барчид муу бүхнийг буцаан сайн үйлийг машид дэлгэрүүлэн бүтээдэг учиртай.
✨Жинсрэг цутгахад чухал хэрэгтэй тус бүрдээ адистид жинлавтай 12 зай байна.✨
1. Шар тос өргөнө. Эд эдлэл, олз омог машид арвижин дэлгэрнэ.
2. Ямшин буюу сүүт мод өргөнө. Сүр жавхлан дэлгэрч хүмүүн хийгээд амьтны сэтгэлд зохистой болно.
3. Гүнжидийн үр буюу Дилнаг \ хар будаа \ өргөнө. Аливаа нүгэл хилэнц бүхэн арилна.
4. Дүрва буюу Өлзийт өвс өргөнө. Олон үет, урт үндэстэй нэгэн төрлийн өвс ба хүмүүнд урт удаан, насан хутаг хайрлана.
5. Цагаан будаа өргөнө. Буян хишиг арвидана.
6. Шасан буюу замбаан гурил, тараг 2-ыг багсарч өргөнө. Дээд амгалан төрүүлэх буюу хүмүүний сэтгэл машид баясгалантай болно.
7. Гүш өвс хамгийн ариун сайхны бэлгэдэл ба идээ ундаа, хар цагаан хэл амны, үхээрийн бузар, хувцасны бузар, улаан махны бузар, архины бузар г.м хамаг бузрыг ариусгана.
8. Юнгар будаа өргөнө. Хүмүүний ажил үйл, амьдрал ахуй, хүсэл тэмүүлэл, сайн зүйл бүхэнд саад тотгор бологч өвчин зовлон, гай барчид бүхнийг арилгана.
9. Овьёос өргөнө. Эд эдлэл, аливаа эд хөрөнгө машид арвидна.
10. Арвай будаа өргөнө. Үүний үрээр үр тариа арвидна.
11. Вандуй өргөнө. Үйлс түргэн бүтэх хүч, ажил үйлийг түргэн бүтээнэ.
12. Улаан буудай өргөнө. Эрч хүчийг дэлгэрүүлнэ.
13. Чадбар зай буюу Ялгамжаат зай өргөнө. Хүмүүний хүч чадлыг дэлгэрүүлнэ.
Орчлон хорвоогийн хамаг үйл нь доорхи 4 зүйлд багтдаг.
1. Амирлангуй
2. Дэлгэрүүлэхүй
3. Эрхэнд хураах
4. Хатуугийн үйл гэдэг эдгээр үйл юм.
