07/09/2022
ഓണക്കോടി വിതരണവും എസ്.എസ്.എൽ.സി, പ്ലസ് ടു അവാർഡ് വിതരണവും നടത്തി.
നെടുമ്പാശ്ശേരി:കൊച്ചി അന്താരാഷ്ട്ര വിമാനത്താവളത്തിലെ ടാക്സി തൊഴിലാളികളുടെ സംഘടനയായ സിയാൽ ടാക്സി ബെനഫിഷറീസ് ഓർഗനൈസേഷൻ്റെ ആഭിമുഖ്യത്തിൽ സംഘടനയിലെ 627 അംഗങ്ങൾക്ക് ഓണക്കോടി (മുണ്ടും ഷർട്ടും) വിതരണം ചെയ്തു. ഇതിനോടനുബന്ധിച്ച് എസ്.എസ്.എൽ.സി, പ്ലസ് ടൂ പരീക്ഷകളിൽ എല്ലാ വിഷയങ്ങൾക്കും "എ" പ്ലസ് കരസ്ഥമാക്കിയ അംഗങ്ങളുടെ മക്കളെ അനുമോദിക്കലും മെമൻ്റോ നൽകി ആദരിക്കുകയും ക്യാഷ് അവാർഡ് വിതരണം ചെയ്യുകയും ചെയ്തു.
തിരുവിലാംകുന്ന് സെൻ്റ് ജോർജ്ജ് ചാപ്പൽ ഓഡിറ്റോറിയത്തിൽ നടന്ന ഓണാഘോഷ ചടങ്ങ് സിയാൽ എയർപോർട്ട് ഡയറക്ടർ സി.ദിനേശ്കുമാർ ഉദ്ഘാടനം ചെയ്തു. സംഘടനയുടെ വൈസ് പ്രസിഡൻ്റ് എം.എൻ.ഗോപിയുടെ അദ്ധ്യക്ഷതയിൽ ചേർന്ന ചടങ്ങിൽ പ്രസിഡൻ്റ് അഡ്വ.ബി.എ.അബ്ദുൾ മുത്തലീബ് അംഗങ്ങൾക്ക് ഓണക്കോടി വിതരണം ചെയ്തു. എസ്.എസ്.എൽ.സി, പ്ലസ് ടൂ അവാർഡ് വിതരണം സിയാൽ ജനറൽ മാനേജർ പോൾ കോച്ചേരി നിർവ്വഹിച്ചു. അങ്കമാലി നഗരസഭ പ്രതിപക്ഷ നേതാവ് ടി.വൈ.ഏല്യാസ്, സിയാൽ ചീഫ് ഫിനാൻഷ്യൽ ഓഫീസർ ലെനി സെബാസ്റ്റ്യൻ, സിയാൽ സീനിയർ മാനേജർ എബ്രഹാം സക്കറിയ, സംഘടനയുടെ വർക്കിംഗ് പ്രസിഡൻ്റുമാരായ എൽദോ. ടി. വൈ, വിനോദ് ചന്ദ്രൻ, സെക്രട്ടറി പി.എ.ഡേവിസ്, എ.ഒ.തോമസ്, ടി.കെ.ബിനു, ടാക്സി വെൽഫെയർ സൊസൈറ്റി പ്രസിഡൻ്റ് പി.ജെ.ജോയി എന്നിവർ സംസാരിച്ചു. യോഗത്തിന് സംഘടനയുടെ വർക്കിംഗ് പ്രസിഡൻ്റ് എൽദോ യോഹന്നാൻ സ്വാഗതവും, കമ്മിറ്റിയംഗം സിബി.വി.യു നന്ദിയും പറഞ്ഞു. തുടർന്ന് അംഗങ്ങളുടെ കലാകായിക മത്സരവും സമ്മാനകൂപ്പൺ നറുക്കെടുപ്പും നറുക്ക് ലഭിച്ചവർക്ക് സമ്മാനം വിതരണവും നടന്നു.
